La biblioteko en Stannum

En la magazeno en Stannum, Östadsvägen 68, troviĝas kelkaj miloj da libroj, ĉefe pli malnova literaturo. La kolekto originas el diversaj kolektoj de libroj, i.a. el la malnova biblioteko de la gotenburga klubo, el la biblioteko de Esperanto-Alianco de Gotenburgo kaj libroj kolektitaj de doktoro Ebbe Vilborg. Inter liaj libroj estas multaj pri aliaj planlingvoj, kiel Ido kaj Volapuko. La libroj de Esperanto-Alianco konsistas plejparte el la librokolekto, kiu devenas de la Uddevalla-esperantisto Einar Dahl.

En la magazeno en Stannum estas ankaŭ kelkaj librostokoj ĉefe de la eldonistoj Al-fab-eto kaj Progreso Eldonejo. Ĉi tiuj libroj aĉeteblas per nia interreta librovendejo. (La sveda Esperanto-movado havas ankaŭ sian propran eldoniston: Eldona Societo Esperanto.)

Loko por esploristoj

La magazeno estas ĉirkaŭ 15m2 granda kaj enhavas ankaŭ laborejon por vizitantoj aŭ esploristoj. Kontaktu nin se vi volas scii pli pri kio troviĝas en nia biblioteko.

Alveni tien

Buso Blå Express haltas ĝuste ekster la lokalo de la biblioteko, haltejo Stannum. Vojaĝtempo de Gotenburgo estas nur 37 min, oftaj veturoj. Aliflanke de la vojo oni vidas la konstruaĵon montritan en la bildo. La enirejo estas ĉe la maldekstra flanko de la domo kaj poste ŝtuparo malsupren. Kontaktu Siv Burell, 070-721 34 79, se vi volas viziti la bibliotekon. Googlemap-adreso: Östadsvägen 68 Gråbo.

La ejo por la biblioteko

La fonduso de Nilsson

Speciala kolekto estas la biblioteko de la Nilssona fonduso, ĉirkaŭ 600 libroj, plejparte pli nova literaturo, kiuj antaŭe estis deponitaj ĉe la Gotenburga Urba Biblioteko, sed post la renovigo de la Urba Biblioteko en 2012–2014, la libroj estis translokigitaj al la hejmo de la prezidanto de la fonduso, Inga Johansson, aperigu la retpoŝtan adreson. La libroj nun estas translokigataj al la magazeno en Stannum.

Ernst Sigfrid Nilsson mortis en 1959 kaj testamentis monon al la Esperanto-movado en Gotenburgo. La volo de la testamentinto estis fondi Esperanto-bibliotekon en Gotenburgo. Post longa jura procezo kaj kelkaj disputoj, la Senprofita Fondaĵo de Tekstila Laboristo E. S. Nilsson (neformale nomata Nilssonska Fonden) formiĝis en marto 1981, kun la Esperanto-Alianco de Gotenburgo kiel komisiinto (la nova komisiinto nun estas Esperanto-Societo de Gotenburgo). La testamento de Nilsson ne estis laŭleĝe aprobita, sed per interkonsento kun la gefratoj de Nilsson, la Esperanto-movado ricevis parton de la heredaĵo kiel donacon. Ĉi tiu parto, kune kun kontribuo de antaŭa monkolekto, fariĝis la bazo por la fonduso. (La fonduso ne estas laŭleĝe fondaĵo.)

En januaro 1982 interkonsento estis farita kun la Urba Biblioteko de Gotenburgo, ke la Nilsson-fonduso aĉetos Esperantan literaturon kaj ke la libroj estos deponitaj ĉe la Urba Biblioteko. La Urba Biblioteko nun ne plu volas agnoski la interkonsenton. Tamen ekzistas Esperanto-libroj de aliaj originoj ĉe la diversaj distriktaj bibliotekoj en Gotenburgo, ankaŭ ĉe la Urba Biblioteko. Tie ili troveblas parte supre en la pruntĉambroj, parte en la magazeno, kaj eblas serĉi parton de ili per serĉilo Gotlib. Kontaktu Inga se vi volas prunti el ĉi tiuj libroj.


Bretaro

En nia ret-biblioteko troviĝas ĝis nun unu titolo:

"Vi vizitis nin, La Eta Princo" de La Merkreda Grupo

(Paperaj libroj troviĝas en nia librovendejo.)